Mae Bernadine McGuire, darlithydd Safon Uwch yng Ngholeg Castell-nedd, sy’n rhan o Grŵp Colegau NPTC, wedi’i hanrhydeddu yng Ngwobrau Balchder Cymru yn ddiweddar, gan ennill y wobr fawreddog ‘Athro’r Flwyddyn’ (a noddir gan Apollo Teaching Services) yn y seremoni a gynhaliwyd yn Neuadd y Brangwyn, Abertawe ar 11 Gorffennaf.
Mae Gwobrau Balchder Cymru Nation Radio, a noddir gan Atlantic Recycling, ac i gefnogi Prostate Cymru, yn dathlu cyfraniadau rhyfeddol unigolion o bob rhan o Gymru, gan anrhydeddu talentau eithriadol a chyflawniadau rhyfeddol y rhai sy’n enghreifftiau o ysbryd rhagoriaeth ac ymroddiad ac ysbryd cymunedol.
Mae’r gwobrau’n dathlu unigolion o bob rhan o feysydd academaidd, y celfyddydau, chwaraeon, gwasanaeth cymunedol ac entrepreneuriaeth. Ymhlith y gwobrau mae ‘Dewrder Eithriadol’, ‘Codwr Arian y Flwyddyn’ a ‘Plentyn o Ddewrder’ i enwi dim ond rhai.
Mae Bernadine, enillydd y wobr, wedi gweithio i Grŵp Colegau NPTC ers bron i dri degawd fel darlithydd Ffrangeg Safon UG/U. Hi hefyd yw Cydlynydd rhaglen Dawnus a Thalentog mewn Addysg y coleg ac mae’n gwneud cyfraniad sylweddol i rwydwaith Seren – rhaglen sy’n cefnogi disgyblion disgleiriaf Cymru.
Mae gallu rhyfeddol Bernadine i adnabod doniau cudd a grymuso ei myfyrwyr yn wirioneddol ysbrydoledig. Mae ei heffaith ar y plant swil a diymhongar hynny, a allai fod wedi cael eu hanwybyddu fel arall, yn anfesuradwy. Trwy ei haddysgu a’i dylanwad, mae hi wedi agor drysau i bosibiliadau newydd ac wedi dyrchafu eu bywydau y tu hwnt i’r hyn y gallent hwy neu eu teuluoedd fod wedi’i ddychmygu. Nid yw natur hunan-ddilornus Bernadine ond yn ychwanegu at ei dengarwch, gan ei bod yn parhau i fod yn anymwybodol o’r ddawn anhygoel sydd ganddi i ddenu cyflawniadau gan bobl ifanc. Mae llawer o’i myfyrwyr wedi mynd ymlaen i astudio mewn prifysgolion mawreddog, gan gynnwys Rhydychen a Chaergrawnt.
Disgrifir gwersi Bernadine fel rhai ‘ysbrydoledig’ sy’n egluro’r gyfradd lwyddo gyson uchel ar gyfer Safon UG/U y mae hi wedi’i chynnal. Y gyfradd lwyddo mewn Safon Uwch ar gyfer Ffrangeg yng Ngrŵp Coleg NPTC yw 100% gyda llawer o’i myfyrwyr yn cyflawni proffil gradd A*/A, sydd yn aml uwchlaw lefelau cymaryddion cenedlaethol.
Mae ei hangerdd a’i brwdfrydedd dros ieithoedd tramor modern yn heintus, mae hi wedi trefnu sawl diwrnod pontio ar gyfer darpar ddisgyblion y coleg ac wedi trefnu i ddarlithwyr gwadd o’r prifysgolion gorau siarad â myfyrwyr Safon UG/U presennol a’u hannog ymhellach i astudio ieithoedd wrth iddynt symud ymlaen i addysg uwch.
Mae parch mawr at Bernadine gan staff a myfyrwyr y coleg ac mae’n aelod gwerthfawr iawn o Academi’r 6ed Dosbarth.
Dywedodd Dirprwy Bennaeth Ysgol Academi’r Chweched Dosbarth, Selina Philpin: “Ar ran tîm rheoli Academi’r Chweched Dosbarth Grŵp Colegau NPTC, rydym wrth ein bodd ac yn hynod falch o Bernadine am ennill y wobr hon. Ei hymrwymiad i’r myfyrwyr fu ei phrif flaenoriaeth erioed, fel y dangosir gan y graddau rhagorol a enillir bob blwyddyn gan ei myfyrwyr Safon Uwch Ffrangeg, ynghyd â’r cyfleoedd academaidd niferus y mae wedi’u darparu i fyfyrwyr fel Cydlynydd rhaglen ‘Dawnus a Thalentog mewn Addysg’ (GATE) Academi’r Chweched Dosbarth. Un ymadrodd sy’n codi’n gyson ymhlith staff ar ôl clywed am gyflawniad Bernadine yw ‘haeddiannol iawn’, ac am y rheswm hwn mae’n anrhydedd i bob un ohonom fod wedi gallu ei galw’n gydweithiwr inni, a bydd colled fawr ar ei hôl yn dilyn ei hymddeoliad yr haf hwn. Dymunwn ymddeoliad hir a hapus iddi.”
