Mae Prentis Coleg y Drenewydd, Theo Buttery, wedi ennill Gwobr Prentisiaeth Cwmni Anrhydeddus Lifrai Cymru 2022.
Cyflwynwyd y wobr i Theo gan Stuart Castledine, Meistr Cwmni Anrhydeddus Lifrai Cymru 2022/3 mewn seremoni yng Ngholeg y Drenewydd. Roedd Keith Shankland, Gŵr Lifrai o Gwmni Anrhydeddus Lifrai Cymru hefyd yn bresennol ynghyd â chyflogwr Theo ORE Brickwork a’i deulu a’i ffrindiau.
Dechreuodd Stuart Castledine y seremoni gyda hanes byr am y gwobrau a’r Cwmnïau Lifrai. Dywedodd y gallai Cwmnïau Lifrai olrhain eu gwreiddiau yn ôl i’r 12fed Ganrif ond nad oedd prif rôl yr urddau Lifrai wedi newid. Eu pwrpas oedd diogelu ansawdd ac enw da crefft ac aelodau cwmni. Cafodd Cwmni Anrhydeddus Lifrai Cymru ei sefydlu 30 mlynedd yn ôl i gefnogi gweithgareddau o’r fath yng Nghymru. Mae’n anelu at feithrin talent Gymreig, ac yn hyrwyddo addysg, gwyddoniaeth a thechnoleg, gan hyrwyddo sgiliau a gweithgareddau proffesiynol cysylltiedig yn benodol yng Nghymru. Nod Gwobrau’r Cwmni Anrhydeddus Lifrai yw datblygu doniau pobl ifanc ledled Cymru.
Enwebwyd Theo am y Wobr Brentisiaeth gan Clare Ward a darlithydd Gwaith Brics Theo, Bill Evans. Mae Theo wedi cael y wobr am ei ymrwymiad a’i ymroddiad i’w brentisiaeth mewn Gwaith Brics wrth gyflawni ei NVQ Lefel 2. Mae bellach yn gweithio tuag at ei NVQ Lefel 3.
Dywedodd Clare: “Mae Theo yn enghraifft wych o sut y gallwch chi gyrraedd eich nod gydag ymroddiad ac ymrwymiad. Daeth Theo atom yng Ngrŵp Colegau NPTC ar ôl iddo beidio ag ennill yr cymwysterau yr oedd eu heisiau, fodd bynnag, gyda’i benderfyniad a’i anogaeth gan ei ddarlithydd Bill Evans, mae wedi dangos ei fod yn fyfyriwr rhagorol sydd wedi rhagori yn ei waith.”
Mae cyflogwr Theo, Keiran Evans, ORE Brickwork Ltd wedi ei gefnogi trwy gydol ei brentisiaeth a dywedodd: “Mae’n aelod ardderchog o dîm Gwaith Brics ORE. Dyma’r ail flwyddyn yn olynol i ORE Brickwork dderbyn gwobr Cwmni Anrhydeddus Lifrai Wales ac rydym wrth ein bodd.”
