Mae arddangosfa oriel Jazz Aberhonddu newydd wedi agor yr haf hwn yn Theatr Brycheiniog, Aberhonddu, gyda chefnogaeth Grŵp Colegau NPTC. Mae’r arddangosfa’n dangos deugain mlynedd o bosteri Gŵyl Jazz Aberhonddu mewn pryd ar gyfer rhaglen mis Awst eleni. Yn helpu i agor yr oriel roedd dysgwyr Astudiaethau Busnes Lefel 3 o Goleg Bannau Brycheiniog, yr oedd eu dyluniadau posteri’r Ŵyl hefyd yn cael eu harddangos o’u gwaith cwrs eleni.
Fis diwethaf, roedd y dysgwyr Lefel 3 wedi uno ag Ensemble Jazz Coleg Castell-nedd i drefnu diwrnod blasu cerddorol a gweledol y tu allan i’r CWTCH, Hyb Cymunedol y Coleg. Fel rhan o’u gwaith cwrs, bu’n rhaid i’r dysgwyr reoli a hyrwyddo digwyddiad, a oedd yn cynnwys drafftio a dylunio’r posteri yn rhoi cyhoeddusrwydd i hyn, sydd bellach yn cael eu harddangos yn y theatr. Y poster buddugol a oedd yn hyrwyddo’r diwrnod blasu oedd yr un coch (yn y llun yn y canol isaf) fel y’i dewiswyd gan y dosbarth eu hunain a Chlwb Jazz Aberhonddu.
Dywedodd y Tiwtor Busnes yng Ngholeg Bannau Brycheiniog, Romina West, fod yr oriel yn: “Arddangosfa wych o’r gwaith caled y mae ein myfyrwyr wedi’i wneud yn eu gwaith cwrs gyda’r prosiect Jazz eleni. Roedd agor yr oriel yn ffordd hwyliog i rai o’n dysgwyr ddod â’r flwyddyn Goleg hon i ben a gweld sut mae’r Ŵyl wedi newid dros amser. Rwy’n falch iawn o’u holl waith a’u cyflawniadau hyd yn hyn ac yn ddiolchgar i Glwb Jazz Aberhonddu am wireddu’r arddangosfa oriel hon yn y Theatr.”
Yn ogystal â’r dysgwyr Busnes, agorwyd yr oriel gan aelodau o Glwb Jazz Aberhonddu gydag ymwelwyr gwadd Richard Walters o Sioe Aberhonddu, a’r canwr jazz, cyfansoddwr a darlithydd prifysgol o Gaerdydd, Dionne Bennett.
Gwahoddwyd Dionne hefyd i fynychu cyfarfod Coleg-Gŵyl, i archwilio a meithrin mwy o gysylltiadau â’r ddau sefydliad. Mae’r tîm Jazz yn edrych ar syniadau i gysylltu cerddoriaeth jazz a’r celfyddydau creadigol yn fwy cyffredinol, trwy rwydwaith y Coleg a Dionne, gyda chynulleidfa iau a mwy amrywiol nag o’r blaen.
Ar y posibilrwydd o ysbrydoli mwy o bobl ifanc i gymryd rhan yn yr Ŵyl Jazz a’r celfyddydau, dywedodd Dionne:
“Rwy’n gyffrous iawn i ymuno â’r Coleg trwy brosiect yr Ŵyl Jazz ac i gynyddu amrywiaeth, cynhwysiant a dod ag elfen iau i’r Ŵyl. Mae plant heddiw yn gwrando ar ac yn chwarae cerddoriaeth jazz, a ddim yn gwybod y cefndir na hyd yn oed mai jazz yw’r hyn maen nhw’n ei chwarae! Rwy’n edrych i weld yr ŵyl wych hon yn cael ei hadfywio ac agor y genre jazz i fyny.”
Dywedodd Clwb Jazz Aberhonddu: “Dim ond 21 oed yw ein prif artist ar gyfer yr Ŵyl (y seren o sacsoffonydd Emma Rawicz) fydd ar y prif lwyfan nos Sadwrn. Mae gennym hefyd raglen ddiwylliannol amrywiol iawn ar gael eto – ond hoffem weld cynulleidfa iau a mwy amrywiol yn cymryd rhan yn Jazz Aberhonddu ar gyfer ei 40ain flwyddyn hefyd! Felly mae’n bleser gennym ddatgelu y bydd tri o grŵp y Coleg eleni yn parhau gyda ni ar gytundebau gweithio ‘llawrydd’ bach, gan helpu gyda gwaith yr Ŵyl. Mae’r cydweithio felly yn cael effaith sylweddol yn barod ac mae llawer mwy y gallwn ni i gyd ei wneud a’i gyflawni trwy gydweithredu.”
Meddai Christine Davies, Cyfarwyddwr Arloesi Rhaglenni yng Ngrŵp Colegau NPTC bod tîm y Clwb Jazz wedi bod yn “ysgogwr yn ymglymiad y Coleg,” a chroesawodd Dionne, a’i chydweithiwr Guto, i’r CWTCH, Coleg Bannau Brycheiniog. Ar ran Grŵp y Coleg, dywedodd Christine eu bod yn edrych ymlaen at barhau i weithio gyda phob parti y tymor nesaf.
Mae’r oriel yn rhad ac am ddim i ymweld â hi ar lawr uchaf Theatr Brycheiniog drwy gydol mis Gorffennaf a mis Awst.
