Mae cyflogwyr a myfyrwyr yn elwa o raglen arbenigol yng Ngrŵp Colegau NPTC sy’n darparu cyfleoedd cyflogaeth.
Yn eistedd o dan ymbarél Biwro Cyflogaeth y Coleg, y rhaglen Cyflogwr Preswyl yw’r gyntaf o’i bath yng Nghymru lle mae cyflogwr mawr yn cymryd y biwro drosodd am ddiwrnod. Mae myfyrwyr nid yn unig yn cael cyfle i gael rhywfaint o gyngor ac arweiniad ond hefyd mynediad unigryw at eu darpar gyflogwyr yn y dyfodol a’r cyngor wedi’i deilwra y gall cyflogwyr ei gynnig.
Mae’r Coleg yn gweithio mewn partneriaeth â nifer o gyflogwyr ac mae Tai Tarian, un o’r darparwyr tai cymdeithasol mwyaf yng Nghymru newydd gwblhau ei flwyddyn gyntaf fel rhan o’r fenter. Yn yr achos hwn mae’r rhaglen wedi meithrin parodrwydd gweithle ar gyfer 12 o fyfyrwyr aml-grefft, lefel 1, gan ddarparu cymorth amhrisiadwy mewn meysydd fel ysgrifennu CV, sgiliau cyfweliad, a phrofiad ymarferol yn y diwydiant.
Fel Cyflogwr Preswyl, mae Tai Tarian wedi rhoi sgyrsiau defnyddiol ac wedi trefnu ymweliadau safle ag amrywiol safleoedd adeiladu mewn cydweithrediad â’i gontractwyr lleol. Mae’r gweithgareddau hyn wedi rhoi profiad ymarferol i fyfyrwyr a dealltwriaeth gliriach o ddisgwyliadau’r diwydiant, gan bontio’r bwlch rhwng dysgu academaidd a byd gwaith.
Mae’r fenter hon yn adeiladu ar Sefydliad Copper Tai Tarian, a lansiwyd yn 2017, sy’n cynnig blwyddyn o waith cyflogedig i unigolion sydd ag ychydig neu ddim profiad blaenorol. Mae dau fyfyriwr sydd wedi bod yn rhan o’r bartneriaeth Cyflogwr Preswyl bellach wedi ymuno â Sefydliad Copper fel gweithwyr llaw, gan hybu datblygiad a thwf eu gyrfa.
Mae rôl Tai Tarian fel Cyflogwr Preswyl yn dangos sut y gall busnesau gyfrannu’n weithredol at baratoi’r genhedlaeth nesaf ar gyfer gyrfaoedd llwyddiannus. Wrth i’r flwyddyn academaidd newydd agosáu, mae’r gymdeithas dai yn edrych ymlaen at ddatblygu ei pherthynas â myfyrwyr newydd ac agor eu llygaid i’r cyfleoedd cyflogaeth sydd ar gael yn y gymuned leol.
Mae Christine Rogers, Rheolwr Adnoddau Dynol yn Tai Tarian wrth ei bodd gyda sut mae pethau wedi mynd:
“Mae ein partneriaeth gyda Grŵp Colegau NPTC wedi bod yn hynod werthfawr. Mae meithrin perthnasoedd gyda myfyrwyr lleol, y rhan fwyaf ohonynt rhwng 16-18 a rhoi sgiliau iddynt ar gyfer y dyfodol wedi bod yn wych. Ond mae eu cael i feddwl am yrfa ym maes adeiladu neu’r sector tai wedi bod yn hynod o werth chweil.
Mae cael dau o’r garfan gyntaf o fyfyrwyr yn sicrhau cyflogaeth gyda ni yn stori lwyddiant wirioneddol ac rydym wrth ein bodd bod y ddau recriwt yn gwneud eu marc eisoes gyda dyfodol disglair o’u blaenau.”
Ychwanegodd Cara Mead, Rheolwr Menter a Chyflogadwyedd Grŵp Colegau Colegau NPTC: “Mae bod yn rhan o’r rhaglen hon wedi gwneud ein myfyrwyr yn fwy cyflogadwy drwy gynnig profiadau bywyd go iawn iddynt, megis cyfweliadau ac ymweliadau â safleoedd adeiladu. Mae cwrdd â chynifer o aelodau staff, clywed am eu teithiau cyflogaeth ac ymweld â safleoedd gwaith wir wedi rhoi rhywbeth i’r myfyrwyr anelu ato, gan roi opsiynau swyddi lleol iddynt eu hystyried pan fyddant yn gadael addysg. Ni allwn ddiolch digon i Tai Tarian am yr effaith y maent wedi’i chael ar ein myfyrwyr eleni ac edrychwn ymlaen at dyfu’r rhaglen ymhellach ym mis Medi.”
