Mae Grŵp Colegau NPTC wedi bod yn dathlu effaith drawsnewidiol ei raglen Mathemateg a Rhifedd, Lluosi. Wedi’i hariannu gan Lywodraeth y DU, mae’r fenter yn cynnig cyrsiau am ddim i helpu oedolion a theuluoedd wella eu sgiliau rhifedd, sy’n hanfodol ar gyfer bywyd bob dydd a dilyniant gyrfa.
Mae sgiliau rhifedd a mathemateg yn hanfodol ym mhob agwedd ar fywyd. Maent yn datgloi cyfleoedd gwaith, yn helpu dysgwyr i gadw rheolaeth ar eu harian, ac yn eu galluogi i gynorthwyo eu plant gyda gwaith cartref neu baratoi i ailddechrau addysg neu symud ymlaen yn eu gyrfaoedd.
Mae’r rhaglen Lluosi yn cynnwys tri chwrs gwahanol:
- Numeracy Matters: Yn addas ar gyfer cyflogwyr sydd eisiau hyfforddiant rhifedd ar gyfer eu gweithwyr.
- Numeracy at Home: Yn addas ar gyfer plant a theuluoedd sydd eisiau gwella eu sgiliau rhifyddeg sylfaenol a mathemateg bob dydd.
- Numeracy for Success: Yn addas ar gyfer y rhai sy’n dymuno ailddechrau addysg neu uwchsgilio.
Mae’r cyrsiau, sydd wedi bod yn rhedeg ar draws Castell-nedd Port Talbot a Phowys, yn cael eu cynnig i unrhyw un 19 oed a throsodd nad oes ganddyn nhw TGAU Mathemateg ar hyn o bryd. Mae’r cyrsiau rhad ac am ddim yn helpu i fagu hyder gyda rhifau ac yn galluogi dysgwyr i ennill cymhwyster cydnabyddedig.
Buom yn siarad â’r Darlithydd Lluosi yng Ngholeg Afan, Jo Sinclair, a ddywedodd wrthym am ddosbarth Numeracy at Home y mae hi wedi bod yn ei gynnal ar ddydd Iau rhwng 5pm a 7pm ar gyfer dysgwyr sydd eisiau datblygu sgiliau sylfaenol ar gyfer bywyd mewn amgylchedd anogol, cefnogol a chyfeillgar.
“Mae’r myfyrwyr wedi bod yn dysgu pwyso a mesur cynhwysion, cynllunio prydau bwyd, cyllidebu, a chyfuno eu sgiliau newydd a datblygol i goginio a pharatoi prydau a phwdinau Nadolig.
Dyma nhw yn mwynhau canlyniadau eu dysgu a’u gwaith caled ynghyd â phryd Nadolig llawn ar gyfer y dathlu y gwnaethant ei gynllunio, ei baratoi a’i goginio fel tîm i’w gilydd.
Ychwanegodd Jo: “Maen nhw’n grŵp gwych sy’n datblygu eu sgiliau rhifedd am oes yn barhaus ac wrth eu bodd â’u profiad dysgu. Rwy’n mwynhau addysgu ar y rhaglen yn fawr a gweld cyflawniadau’r myfyrwyr. Maen nhw’n dysgu amrywiaeth enfawr o sgiliau am oes ac yn mwynhau’r ystod o brofiadau academaidd a chymdeithasol y mae’r math hwn o gwrs yn ei ddarparu. Mae croeso bob amser i ddysgwyr newydd.”
Mae myfyriwr arall o Lluosi, Louise Forsyth, wedi sicrhau gwaith fel Goruchwyliwr Amser Cinio yn Ysgol Iau Central ym Mhort Talbot. Mae’n priodoli ei llwyddiant yn rhannol i hyder cynyddol o ganlyniad i gwblhau cwrs Lluosi gyda Grŵp Colegau NPTC, a gynhaliwyd yn Ysgol Gynradd Tywyn, lle mae ei phlant yn mynd i’r ysgol. Sefydlwyd y cwrs trwy bartneriaeth rhwng Grŵp Colegau NPTC a Phennaeth yr ysgol, Mrs McHugh, a welodd yn syth fudd y cwrs i rieni disgyblion yr ysgol a’r disgyblion eu hunain, gan y byddai’r cwrs yn rhoi’r sgiliau rhifedd i rieni oedd eu hangen i helpu eu plant yn hyderus gyda gwaith cartref mathemateg a rhifedd.
Trefnodd hi, ynghyd â thîm Grŵp Colegau NPTC, i ddosbarth gael ei gynnal yn yr ysgol rhwng 1pm a 3pm bob dydd Iau, gan olygu y byddai dysgwyr fel Louise yn gallu mynychu’r dosbarth ac yna casglu eu plant o’r ysgol yn syth ar ôl hynny. Eglurodd Louise mai’r ffactor hwn a’i denodd at y cwrs i ddechrau, gan ei bod mor anodd i rieni fynychu cyrsiau pan fydd yn rhaid iddynt gasglu o’r ysgol. Fel mam amser llawn am y naw mlynedd diwethaf, nid oedd wedi gallu mynd yn ôl i fyd addysg nes i’r cyfle godi drwy’r rhaglen Lluosi.
Roedd Louise hefyd wedi cofrestru ar y cwrs Numeracy at Home, a fynychodd rhwng Hydref 2023 a Gorffennaf 2024. Yn ogystal â dysgu sgiliau rhifedd gwerthfawr, dywed Louise iddi ddatblygu ei hyder a dysgu sgiliau gwaith tîm, a arweiniodd ati yn ymgeisio am ei swydd bresennol yn yr ysgol. Mae Louise nawr yn rhoi ei sgiliau newydd ar brawf bob dydd. Dywedodd wrthym na fyddai hi byth wedi gallu magu’r hyder i wneud cais am y swydd hon oni bai am y cwrs Lluosi. Ers cwblhau’r cwrs, mae Louise nid yn unig wedi sicrhau cyflogaeth ond hefyd wedi cofrestru gydag asiantaeth addysgu lle mae wedi cwblhau cyrsiau hyfforddi pellach ar Ymwybyddiaeth o Awtistiaeth, Ymwybyddiaeth o Epilepsi, a Diogelu, gyda’r nod o symud ymlaen i rôl cymorth dysgu yn y dyfodol agos.
Dywedodd Dawn Mather Nicholson, Tiwtor Lluosi Louise: “Mae fy holl ddysgwyr Lluosi wedi cael tystysgrifau am eu gwaith caled a’u hymroddiad i’r cyrsiau. Maent i gyd wedi rhoi 100%. Mae rhai dysgwyr bellach wedi symud ymlaen i’r lefel astudio nesaf, ac mae eraill, fel Louise, wedi gallu sicrhau cyflogaeth ar ôl cwblhau’r cwrs. Rydw i mor falch o bob un ohonyn nhw.”
Mae ein rhaglen Numeracy at Home yn cynnwys cyrsiau Blasu, Dechreuwyr, a Gwella sydd wedi’u cynllunio i gefnogi rhieni a gwarcheidwaid i wella eu sgiliau rhifedd er mwyn sicrhau eu bod yn gallu cefnogi plant oedran ysgol i ddatblygu eu sgiliau rhifedd. Mae’r cyrsiau wedi’u bwriadu ar gyfer dysgwyr sy’n gweithredu o Lefel Mynediad i Lefel 1.
Ychwanegodd Sophie Picton, Cydlynydd Cwrs Lluosi yng Ngrŵp Colegau NPTC: “Mae’n wych gweld dysgwyr yn magu hyder ac yn dysgu sgiliau newydd sy’n berthnasol i fywyd go iawn trwy gymryd rhan yn rhaglen Lluosi, Numeracy at Home Grŵp Colegau NPTC. Ochr yn ochr â’r ymrwymiad trawiadol i wella eu sgiliau a ddangoswyd gan ein dysgwyr, mae’r cyflawniadau hyn oherwydd ymroddiad y staff cyflwyno sydd wedi gweithio’n ddiwyd i ddod o hyd i ffyrdd hwyliog ac arloesol o wneud y cwricwlwm rhifedd yn hygyrch. Mae hyn, ynghyd â haelioni ein partneriaid lleol, megis Mrs McHugh yn Ysgol Gynradd Tywyn, sydd wedi cefnogi hyrwyddo cyrsiau a darparu gofod cyfleus i rieni ddysgu, wedi sicrhau llwyddiant parhaus y rhaglen. Hoffem achub ar y cyfle i ddiolch i’n holl bartneriaid sydd wedi ein cefnogi fel hyn.”
Wedi’ch ysbrydoli i gamu yn ôl i ddysgu? Cliciwch ar y botwm isod i ddarganfod mwy am ein Rhaglen Lluosi yng Nghastell-nedd Port Talbot.
Lluosi Cyrsiau Mathemateg a Rhifedd
Pic Caption: Louise Forsyth gyda’i thystysgrif cwblhau Lluosi gyda’i Thiwtor Lluosi, Dawn Mather Nicholson, Pennaeth Ysgol Gynradd Tywyn, Mrs. S. McHugh, a Maer Castell-nedd Port Talbot, y Cynghorydd Matthew Crowley.
